|
"Meviele suteté ta kofolira ok puvera". Virginia Woolf
Adeline Virginia Stephen ba 25/01/1882 koe London? koblir. Nasbeikya ke Leslie Stephen kotgrupaf tanizvik is trakuropik, gan gadikye va akvavansafa gaanhara, lize gruadafa rilituca zo bristur. Bata vola ke grupelaf is ginukaf is mivlanaf gadik, va blira ke nasbeikya arton tcalar.
Bak 1895, tison sanbardafa, va gadikya Virginia drasur. Va inafa ranafa swavamilbava bata awalkera vilar aze ko oviskuca in abicugale flaydur. Moi awalkera ke gadikye bak 1904, va kot prist va nizdeblioakolaf swavaz Virginia tolon exaksar. Do Vanessa inafa berikya isu toloy berikye ko Bloomsbury revava koe London inkewer. Batlize "Bloomsbury rijay" tazukawer, metazukafa lospa dem gruadik se fereon va sint kagrupes, koeon tir Leonard Woolf rietovik kuretes va Virgina bak 1912.
Sutera, wetce exava blidana, bak 1905 koe suterotafa loaca ke Times fela bokawer. Dison va pofa anda, va se rolona is plukewera Virginia Woolf me naler. Kotbliron, tori gropa ke ayikyeem lhumar. Mali 1910 tori ayikyafa liburaroka vilter.
Bak 1917, do kurenik va "Hogarth Press" piskuratretca redur, dana va targafa estova di tadler ise askir da vanmiae artan se T.S. Eliot is Katherine Mansfield zo gruped. Va "The mark on the wall" is "Kew Gardens" (1917) is "Night and Day" (1919) warzot yo sanegar, ise wal nikeem is koyara se is kobara ke sutesik is piskusik va tegirafa blira dir.
"Jacob’s room" berpot bak 1922 zo sanegar. Bat berpot katctar da va tuwarzasa kobara icde berpotbunhera in bokar. Va nega Virgina liper ise sol gimbaf pwaderavexaleem va int tunuyar. Tuelimar : "sutesik trakur da godafur va skujera ik buska is folva ik rena is siva ke rotisuca, va kote donarison jonte kiewon da ede kota brucka co-tublisawer kale ironokaf tialt co-tir cavavagekiranhaf. Blira tir bata ? Kas berpot se baton gotid ?".
Bak 1925 is 1927 va toloy grot Virginia Woolf sanegar : va "Mrs Dalloway" is "To the lighthouse". Va berpotafe brube bam tulodaludevar ise ko suteroteem nijur tana lorukuzafa is logustafa puda. "The waves" bak 1931 zo sanegar ise gan sanegap zo emudenher. Radimi tevda, va "bata merodolunhena armorafa sutera" koe "The Years" belisik toltrasir.
Tomatomon kosaf gu blirakolaca yo, va in vebesa, in lwir da ben grabom dum kup modemar. Vexe ba 18/03/1941, mo baza ke kurenik va twa Virginia Woolf aykar : "Tí lanaf da fu tuoviskawé : peztalé da va ara mana rekolaja rotabitit. Peztalé da battomon me roranhá. Tozú da gildé va puda yo ise va int me grupistá. Bam askí inde gonaskinon folí. Pu jin va tela kalapuca al zilil… Mea rolhumá, grupé da va rinafa blira kalgrebé, da voldo jin co-rokobal."
In va "Between the acts" intaf nubasuteks kopiuter aze kan rapor se ucomkopler aze poke intafa mona ko Ouse kuksa va int mimar. "Va jin kle iskec, dum rumeik lebanugon abdulanis ko fentafa kuksa, ware titlanis va lava".
|
|
Ara ava se
 Virginia Woolf
 Virginia Woolf
|
