Katherine Mansfield, ke dan ageltiluf yolt tiyir Kathleen Beauchamp, bak 1888 koe Wellington? koe febapafa yasa ke warzazelandaf glastikeem al koblir, vexe di awalker 34^-daf. Tison 20^-daf va yasaf vierm otcer ise ko London? va int divblir lize bak 1909 va pudopatavesik kurer va dan eldeon di bulur. Bak 1918 va John Middleton Murry suterotaf malhopasik tolkurer. Koe Bayerna is Provenca is Italia is Swiza di jonvieler. Ba 09/01/1923 koe Fontanebleau koe Franca golde kotcakola al awalker.

Ede remi ugal, kan tanoya adala liafa blira ke Katherine Mansfield zo rovilder, in otcer aze dimpir aze tuakolawer aze awalker jotaf, inafa meromilaskina sutera zavzar bulapa. Wetce kotraf suterot, va warzot is ilkapone is tweem in al anton isker, trabe abiccoba tori suterotikap. Davon tir amidaf gu ar englavaf suterotik se dan va rupa ba koblira ke gradilik narid aze remi zixa se kal tenafa grogara vaon jupad. Katherine Mansfield va yasa ik anameda kiblar. Rem ugal va gabera askir ise va lit se ke tisik yo pimtar bak kiblan gemeltam icdeon cenkason kan anton sinaf trakukseem isu oulakalikseem. Pilke ke yanba ke Katherine Mansfield dere tir kiblara, wetce wats ke inafa vayara, va entaf viel tcalan gan mek cugunaykaf bif. Kan inafa sutera, opelafi yasafi tegi ik grilizeblira ik ilanuk ik kapama vanblid kontegaklita.

Kotrafu ageltilu
Belira va warzot se ke Katherine Mansfield roxayer. Nega se ke newzelandaf suterotik va cultimeva divvawad. Sin levgon azavzawed viele djumet da abdujijawed. Tolwelved liz me zo ked. Vamoe imwavioma se ik sveridank ik kseva ke gum ik kofigasiki ke dieka moe lima ik bitejkiraf kipeks yo ke rumeik klokes va "kotvielee" vangaved. Katherine Mansfield me tir geltriluevaf suterotik. Vexe kan glebasaca ke fereon ayewasa is sedielafa vols asblisa pinta va kotrafu geltrilu wir.

Koe bat litevaf suteroteem griva va rumeilu is awalkvudera belcon gluyawed. Baliafa oula sokir viele bak 1915 ko Engla? Leslie inaf lojotaf albapan berik artpir ta da wetce sayakik va arpolia in kazokever. "Va sintafu taneafu rumeilu ve konakbartivon flideyed, John Middleton Murry setiker. Bam inya ve gorayar da va blitolnasbara ektur dum koe Warzazelanda al bliyir ise al peztaleyer". Awalkera ke tel berik, arti aksat, va inafa erava ve gruyeyer. Kadimion, ko Bandol va Engla Katherine Mansfield bulur aze toz kobar ta abrotcaf warzot, ta nega va inafu rumeilu. Kan "Prelude" vergumvelt bat warzot di sanegar.

John Middleton Murry pwader da radimi sanegara va "Bliss" larm lize "Prelude" warzot tir taneaf, inya toz kazawar va twa se ke opelik yo albas va inaf suteroteem is nelkon koefa pinafa Kezia. "Inya ve peztaleyer blodafa dolge man belisikeem. Pu in va geltilu is anton geltilu danuyur. Bata abdikerelera va gelte, va inafe sutene gelte, va inafe glogagelte ta da in rotir muxarabagaliaf, vanpir vumbesa skewera ke inafa ironokafa blitanda se".

Koefa tukarara
Bak 12^-aksat 1917 Katherine Mansfield tumenomakolapawer. Va koyara se jonkar : va Bandol az Ospedaletti koe Italia az Menton az Montana koe Swiza. Viele bak 1922 "The Garden Party and Other Stories" zo tusanegar, dan va in ve askotgrupilayar, dene in sutera al vanpiyir volromotidana sufera, lhumara va akola is koefa minia da abdi rotabduxoara va koefa tukarara in di gokotaskir.

"The Canary", inafa entenuyuna ironokafa nega bak 7^-aksat 1922 zo tenur. Arti baroy aksat, va sutera in ebkar ise ko Fontainebleau koe Gyurdjiyev viray bulur. Ba 09/01/1923 Katherine Mansfield laizon awalker. Inafa blitena ve tiyir anayara va entulebawera va dan pone gwidanhon vrutar. "Engalova al sokir, in suter. Al tolvanpí rumeik. Va tamava is cot is degrik megrupé. Koe jinafa gesta is anton kotlize blir". Va ezlopa skotcasa veda ke Katherine Mansfield zo fereon duvur. Lexa dere zo rodivrozar, icde in dan viele tiyir jotaf ve djuvanpiyir dingeltokusik. Lexa va dana anton kon "norlik" yo asgrugilded.

Virginia Woolf milugalikya icde in al kalir va : "Tir tela antafa ayikyafa sutera icdeon tí lijkafa".

• In a German Pension (1911)
• Prelude (1918)
• Bliss and Other Stories )1920)
• The Garden Party and Other Stories (1922)
• Poems (1923)
• The Dove’s Nest and Other Stories (1923)
• Something Childish and Other Stories (1924)
• The Journal of Katherine Mansfield (1927) - pone
• The Letters of Katherine Mansfield (1929) - tweem