Moe tela toleafa winta greciik sokeyer :

- Ax ! Ax ! Batse worara ke mafelasik ! kozwison va sersikam greciik iluon ve divieyer.

Kire, sedme greciik, ar ayik tir mafelasik.

- Kiavá, sersikam ve kaliyir. Rin va atedafi edji digil.

- Tir ta kiavara, greciik ve dulzeyer. Tir ta kiavara viele zo vankievé. Volfikunton, metan batlizo konviele koolanir.

- Ax en ? megrupeson sersikam ve kaliyir.

- Tanaron nubadendal, greciik kle ve pirdayar.

Sersikam tanaron ve nubadendayar. Greciik edjimadason moron ve kiavayar.

- Batcoba tir lodeasesa dam worara va gazik, sersikam koeon ve trakuyur. Aze tanaron tolnubadendayar. Greciik edjimadason ve tolkiavayar.

Arti aluboya funtesa wexa sersikam golde tankomuca ke vefara cueyer :

- Voxe, ta da edji luber, in ve eruyur, va tokcoba gonaskí ?

Vexe greciik me ve gildeyer. Bet greciik va siskera anton grugilder.

- Kas va jin en mafelapal ? in pu sersikam ve eruyur.

- Toka tir sugdala ke « mafelá » trogarn ?

- Mafelara sugdalar da wetce tel lolistik isu lokiewon vagekirik is tel lokulik ke winta isu logruik jin zo krupté.

- Vexe moe winta rin til antaf !

- Va jin tupuveal. Vaon soe mafelal !

- Va rin mafelá, sersikam tidepitamason ve kaliyir, vexe koe tokcoba ganon zo dlapal ?

Aze sersikam ve mallaniyir.

Milgik en gitir abigaf, bal koyara sersikam va int opelon ve kaliyir.