Kotvielon va koncoba icde winka ik maltalara ik koyara jin raveyé. Batcoba, xuyavon gu undera, zijnamon sokiyir. Batinde bak bareaf viel piza icde cabdaal se jinon ve zo grupeyer.

Ware batviele tiyir tuke namulol, kire laizon sersikam va jin ve koeruyur dum ede gorston toz etrakayar :

- En ageltafa, mex, namulol va aalam sokestur ?

- En. Ageltafa.

- Ax ! Tí valeaf.

Jin me grupeyé dume namulol va aalam gonestur. Vexe sersikam ve loplekuyur :

- Acum in va cabdaal dere sokestur ?

Jin pu sersikam ve askiyí da in katcalar da cabdaal me sotir aalam vols aal gijaf dum uja ise da kore in va varaf fuzoleem doon co-divburer, bata milkava va tanoy cabdaal me co-grumaer.

Rieta va fuzoleem ve askiyir da sersikam kiper :

- Fuzol se, tan mo ar zo co-goplekud…

Vexe in proyon ve katcalayar :

- Cabdaal, abdi da tulodontinar, taneon tir omaf.

- Tageltafa ! Vexe tokdume djumel da namulol va cabdaalam co-tokestur ?

In pu jin ve dulzeyer : « Ex ! Neix ! » dum ede batcoba tiyir denaca. Nume, ta da va bat zvak jin miv gruvangrupé, ve grupon gosugayar.

Keskeon, moe winka ke sersikam, dum moe beta winta, tiyid werdanh is rata. Acum werdanhaf fayanh is rataf fayaj. Vexe fay se tid merowin. Koe birge ke tawa kenibed kali da tan toz divmoder. Bam divimpawer ise felbes mewupes gamot van awalt taneon vazon atrir. Ede tir gamot ke rezold ok raltaal, rotatrir dum djumer. Volse rata, mali da zo kagruper, tapleku zo godivzaetawar. Okie tiyid eaftaf fay se moe winta ke sersikam… tiyid cabdaalaf fay se. Sid ke winta tiyir demon devilanaf. Okie griktera va cabdaal, ede gaverson askit, sotir volrotisa. In va kotafa winta tervar. Kan zaeeem vaon fer. Voxe ede winta tir pinarsafa ise ede cabdaal slikote tir, in vaon roidar.

« Tir ugduum, sersikam pu jin logaveon kaliyir. Viele gazdatcatera tir tenuyuna, winta ropeson zo gotcater. Rin va int gubeon goneyodel ta da va cabdaal divzaetawal mali da in sol jotapon vektapas raltaal zo rosolwir. Tir vrokapafa vox drikafa kobara. »

Konviele in ve pirdayar da jin va kiewaskira va zovdanhaks yová ta da batcoba ko taka ke denef rumeikeem koawer. « Ede rumeik co-koyatar, in kaliyir, batcoba zanudatar. Kontomon arevlara va kobara tir rotodiskafa. Vexe, ede tir cabdaal, kotviele zexa. Jin va winta lize vungik irubayar grupeyé. In va baroy aalam al iskedayar… »

Nume, tuke bazera se ke sersikam jin va bata winta zovdayá. Me albá da tí kan lidopusikaf kom. Vexe wupe ke cabdaal tir grupensen ise arpuma va kontan eglus moo koca tir zolonapafa maneke va weyustuca radeon divá. Jin kalí : « Rumeik se ! Va cabdaal obrac ! » Walzera va nikeem lidam jin icde malipon kactane wupe batenide jin va bat zovdaks jontikeke kobayá. Jinafa zilina tavera vodanhayar. Rin rotir eruwel : Tokdume, koe bata neva, me tir zovdaks lidilamtaf dam tel va cabdaal se ? Dulzera tir opelanhafa : Jin yovayá voxe rodjeyé. Viele va cabdaal yo zovdayá kan kwitapeztaka zo tubliyir.